تقول الماضي اجمل قلت:لا وحياتك الّي آت
تقوله واسمع العبره تطق بصدر مخفيها
تحاول تبتسم لكن عيونه تختنق آهآآآت
وانا رغم ابتسامتها ذبحني حزن عينيها
بكيت بداخلي لأجله ومارست البكاء بسكات
وحاولت اخنق العبرات في صدري واداريها
خنقته حيل في صبري على حدود العيون ومات
وكفنته وسكنته مقابر صدر راعيها
ولا كنت احسب الميّت يبي يبعث بشكل ابيات
ولكن حان ميعاده على الأوراق واقريها
سلام اجمل من فياضٍ سقاه المزن عصر وفات
و الزهر بأطرافه يودع نجع ساقيها
خيوط الشمس تعكسها على خضر الورق قطرات
تميل بتسقطه عنها وهو متمسكٍ فيها
واذا جيت اتأملها فهي لوحة من الآيات
وفيها ياصل الأبداع الى اسما معانيها
سلام اطهر من الغيمه سلام الطف من النسمات
سلام ادفى من احضان ام ضمت حيل غاليها
سلامٍ ٍ تكتبه شهقة محب وتحمله زفرات
سلام ٍ يشعل الذكرى ونار الحزن يطفيها
سلام ٍ حاتمي ممن ورث من حاتم المدات
سلامٍ ٍ ينثني للذاكره ويقبل ايديها
عساك بخير يا قامة تلاشى دونه القامات
يـا أجمل فصل بسنيني من اولها لتاليها
تعالي لملمي قلبٍ غدا بعد الغياب أشتات
تعب ياقمة احلامه ويا أسما امانيها
واذا جاك الخبر في يوم قالوا لك بدر قد مات
تعالي يالغلا لأمي وواسيها وعزيها
وقولي له انا واياه كنا من زمان اموات
كتبنا بأول سطور الحكاية سطر تاليها
وانا واياه كنا في اساطير الغلا سادات
وكنّا الدولة العظمى بحاضرها وماضيها
وانا واياه واحلام الغرام وقسوة العادات
رباعيه بها يبدأ القصيد وينتهي فيها