حــروة...
 

دخيـــل الــرّيح لا منها سفت هجعة قصايدها
تخـــزّ رقادهـــا والنّفــس للهجعـــة شفــاويّة

عقــــب مـــا هـي تلولس بالذّعاذيع وتكايدها
اليـــن احساسها المتعــب يلجلج في شكاويّة

تبـــاطت والمدى حروة تنقّضها جـــدايدهــا
تقـــل درب البطا عــوّد فتلهــا فــي حراويّة

يقول الّليل لا منّــه غفـــى هـــذي عــوايدها
تبـــات بردنـــي الضّافــي مثـل قمرا حياويّة

يضيق ابها الفكر مرّة وأنا بالحيـــل رايــدها
وأخاف الصّبح يسرقها وأنا خيوطي سماويّة

هنـــيّ الحبــــر لا منّـه لفى بالشّوق عايدها
يهز عذوقها لـــو هـــي عن المعنى سهاويّة

هنـــيّ الغيـــم لامنّـــه تشــربك في قلايدها
فهقه البارق المركــي علــى ثغـــر النداويّة


وهــج

صح لسانك
قصيدة تشبهك كثيرا

كبيرة يا وهج
وحرفك شديد

احتاج لقرائتها أكثر
من مرة ..

سلمتِ وسلمت القريحة

جميله
لابد من الترابط والحفظ على الوزن

وش معنى جدايدها؟

صح لسانك يا وهج

فهد العجمي
شكرّا لمرورك الأنيق
والترابط بالتأكيد من أهم عناصر أي نص أدبي
وجدايدها هنا يعني جديدها من القصائد المنتظرة

صح بدنك حبر
ممتنة لمرورك
تقديري لسموك