(يلوفني طيفه)


لا دك هاجوس الشعر زان لي القاف
يحلا لي اوصف به حسين الوصايف

اللي عليه مسحه من الحسن تنشاف
حسنه على كل المخاليق نايف

يلوفني طيفه و يتلفني اتلاف
ويسبي بعين وخد وحمر الشفايف

شعره حرير اسود سجد فوق الاكتاف
منها يحول لين حد الردايف

ضامر بطن و اللي على الصدر وقاف
يشكنٍ من اسلابٍ تحفه حفايف

و عودٍ ليانٍ و يتعطف تعطاف
مليان ردفٍ ويعتليه خصر هايف

ياويل قلبي ان كان بالحال ما راف
عز الله اللي راح عمري حسايف

ان غاب عني بعده العمر ينعاف
من عقبه مهما صار مانيب خايف

ونيت يوم عديت في راس مشراف
وهلت دموعي فوق خدي ذرايف

وصلاة ربي عد ما طايفٍ طاف
على نبينا سيد كل الطوايف


الشاعر/مبارك بن سالم المصلح الحربي (ابن دهيم)