فرقا :

لابد يومٍ حولي الربع جاثين
والطفل دمعه فوق صدري همايل

يبكي فراقي قبل مالموت يطوين
وأصير وحدي حدر دق الرمايل

يدري فراقي ماهو أيام وسنين
فرقا إلى يوم الحشر والهوايل

أرجيك ياصالح كـعام المعادين
حـمّاي ربعه يوم رمْي النصايل

لا من رأيت الربع بالنعش مقفين
والدمع يجري مثل وبل المخايل

ثم جاك خلي كامل الحسن واللّين
قله أبو بسام حدر النثايل

ياما سهر بالليل والخلق غافين
يشكي غرابيل العيون االكحايل

واليوم ماله بالوصل ياأريش العين
وده بغفران الذنوب الجلايل

ارفع كفوفك وادع ملجا الضعيفين
يدمح له الزلة ويرفا الخمايل

واكتب على قبره ياشوق المزايين
بيتٍ من المسحوب يبرا الغلايل

هذا أبو بسام عقب أدعج العين
أقفن سنينه مثل برق المخايل


سهير الشوق

قلبي يابو عايد تقفَّاه لعاج
من خشف ريمٍ ثغرها لول منضود

غديت أهني بالوسن كل هلباج
وأنا سهير الشوق بالرجم مضهود

أشكي فراق اللي سلك عدة افجاج
شد الضعن واندرست آثار الأملود

من بيننا حالت مهاميه وازراج
وثور الدخن والدرب لا جيت مرصود

أخاف لا جيته عقب شيبي محتاج
يصد ما كني من الهجر مجهود

أو لا تجاورنا القبر عنه ينباج
حتى حرام الشمل يلتم بلحود

يالله يا منزل من السحب ثجاج
تروف في قلبٍ من البعد ملهود

الموضوع الأصلي: فرقا - سهير الشوق : || الكاتب: #عـبدالعزيز# || المصدر: منتديات أمل عمري